Ngagebah Reungit Panganteur DBD

Aedes mosquito sucking blood — Ilustrasi nyamuk (Foto: Getty Images/iStockphoto/Noppharat05081977).

Bandung -

Allah SWT nyiptakeun reungit. Nepi ka kiwari kaidéntifikasi aya 3.490 jinis reungit di alam dunya (Harbach jeung Howard, 2007), kaasup Aedes aegypti anu jadi panganteur (véktor) virus dengue.

Dengue téh sajinis virus harééng nu narajang awak sarasa awak téh tulangna parotong (break-bone fever). Dianteurkeun kalawan cocoan reungit Aedes aegypti bikangna, virus ieu ngalalakon asup kana jalan getih dina awak jelema. Di Indonésia kasebut wé nu kitu téh Demam Berdarah Dengue (DBD).

Baca juga: Pagilinggisik jeung Maung?

Naha reungit téh perlu getih? Sakumaha didadarkeun ku Wahyu Tri Agustin dina skripsina di Universitas Jember (2017) ngeunaan reungit salaku vektor panyakit, reungit bikang perelu nutrisi tina getih sangkan bisa ngendog.

SCROLL TO CONTINUE WITH CONTENT

Hanjakalna, waktu jinis Aedes aegypti nyoco, ieu reungit mawa virus. Balukarna nu dicoco keuna virus terus gering. Numutkeun para ahli, sanyatana nu jadi véktor DBD téh lain hungkul Aedes aegypti tapi ogé Aedes albopictus.

Tapina, anu remen pisan pagilinggisik jeung jelema mah Aedes aegypti alias 'Si Belang', ngarujuk kana awakna anu hideung belang bodas, sabab Aedes albopictus nenehna 'Si Macan Asia' mah kalolobaan hirupna di leuweung.

Di Jawa Barat, DBD keur nerekab. DetikJabar, Minggu (24/3/2024) medalkeun iber réhna dina Januari-Maret 2024, unggal poéna aya saurang warga Jawa Barat anu tilar dunya alatan demam berdarah. Jumlah kasus DBD-na sorangan 11.729.

Sagala rupa tarékah dilakukeun ku pamaréntah sangkan jumlah kasus katarajang demam berdarah téh ngurangan. Penjabat Gubernur Jawa Barat, Bey Machmudin mundut sakur kapala daerah kabupaten/kota milu ngagebah reungit vektor DBD ku jalan ngabinasakeun tempat-tempat nyayangna.

Badé teu hariwang kumaha atuh, da gening nepi ka ping 25 Maret 2024, geus aya 105 urang warga Jawa Barat anu tilar dunya alatan katarajang DBD. Lolobana malah nu maot téh saumuran budak.

"Kuring mundut sakur kapala daerah ancrub ka masarakat, ngilu aub ngaberesihan tempat-tempat nyayangna reungit," ceuk Bey Machmudin, dikutip detikJabar.

Tabéat Reungit Aedes Aegypti

Kumaha ngabédakeun reungit Aedes aegypti jeung Aedes albopictus tina reungit-reungit séjénna? Keur jelema anu waspada mah, tangtu kapanggih naon bédana. Para ahli nyebutkeun cirina di antarana aya dina polét bodas palebah mesonotumna (tonggong).

Aedes aegypti boga lyre, nyaeta gurat bengkung warna bodas di dua sisi, jeung dua garis bodas vertikal dina submedian mesonotum. Ari Aedes albopictus teu boga lyre, nu aya ngan saukur sagaris bodas dina tengah tonggongna.

Ciri pisikna gé béda, tangtu reungit boga tabéatna masing-masing. Aya nu tempat hirup jeung baranahanana teh di leuweung, dina beungeut cai dano, ogé aya nu bisa nyayang di mana waé, kaasup dina cai leuncang.

Reungit Aedes aegypti mah milih nyayang dina tempat-tempat beresih, jiga cai beresih anu nyangkrung dina wadah, dina susukan, dina jero bak mandi, cindekna dina tempat anu caina teu antel langsung jeung taneuh.

Tapina, sanajan hirup jeung ngendog dina beungeut cai nu beresih, reungitna mah teu bisa dianggap beresih tina panyakit.

Anu nyababkeun reungit mawa panyakit téh nyaéta aktivitas neangan daharna. Reungit Aedes aegypti sok hiber neangan dahar dina pukul 08.00-12.00 jeung pukul 15.00-17.00 unggal poéna.

Reungit jalu mah kaperluan daharna téh nyaéta gula tina néktar kembang atawa sumber séjénna. Ari reungit bikang perlu nutrisi tina getih jangeun minuhan nutrisi endog anu dikandungna. Ku kituna, reungit bikang nyoco ka jelema.

Nu leuwih antik, reungit bikang téh teu cukup nyoco ka hiji sumber getih. Perlu leuwih ti saurang anu dicocona nepikeun ka kabutuhan getihna kapinuhan. Saumpamana reungit téh nyoco ka jelema anu geus kaserang virus dengue, terus ingkah balilahan nyoco deui ka jelema anyar, atuh virusna jadi sumebar.

Sumebarna virus denguetéh nalika Aedes aegiptynyocojelema sok bari ngaluarkeun ciduh sangkangetih palebah titikcocoanteu kuled. Tah, ciduh éta eusina virus.

Tugas keur Balaréa

DBD nerekab di Jawa Barat. DBD sorangan can aya ubar hususna. Nalika katarajang DBD, uubar téh sabenerna ngawincik hiji-hiji gejala anu karandapan. Lamun nu dominan panas, nurunkeun deman jadi utama. Lamun urusanana trombosit, maka ngajadikeun trombosit stabil jadi tarekah pangmimitina. Jelema katarajang DBD kudu gancang dibawa ka rumah sakit saméméh aya komplikasi.

Kumaha atuh cara nyingkahan DBD? Nu paling bisa diandelkeun mah nyaéta ngagebahkeun reungit jeung tempat nyayangna. Ieu téh kudu jadi kabiasaan, sabab gening DBD mah sapanjang taun aya, jeung sok aya waktu-waktu puncak narajangna jiga usum pancaroba kiwari.

Di antarana cara ngagebahkeun reungit vektor DBD téh ku gerakan 3 M: Meresihan panampungan cai; Masang tutup keur panampungan cai; jeung Mendem barang-barang geus teu kapaké. Eta 3 M téh sangkan ulah aya lolongkrang pikeun cai beresih dipaké tempat ngedog ku reungit Aedes aegypti.

Kepala Dinas Kesehatan Jawa Barat, Vini Andiani Dewi samalah nambahan, gerakan 3M téh kudu make "plus". Tambahanana nyaéta warga daék miara lauk anu kadaharanana téh utek-utek (jentik) pireungiteun, ogé ku jalan melak kekembangan kayaning lavender anu reungit kurang suka kana angseuna.

"Ronjatkeun kawaspadaan, boh di panganjrekan, di lingkungan, atawa di tempat gawé," ceuk Vini ka detikJabar, Jumaah (29/3/2024).

Ngagebah sayang reungit Aedes aegypti téh nyatana lain tugas pamaréntah hungkul da nyinghareupan sato diptera (dua jangjang) anu ukuranana kurang ti 20 mm, tapi radius hiberna 400 meter, rada abot ogé upama teu dirojong ku tarékah sakabéh warga Jawa Barat hususna.

Hikmah ti Sakadang Reungit

Sakumaha di awal tulisan ieu, nu nyiptakeun reungit téh Alloh SWT. Kasakséni ku balaréa réhna teu aya hiji ogé ciptaan mantenna anu teu miboga pungsi. Kaasup reungit, sato leutik pagawéan nyoco.

Para ahli nyebutkeun, reungit jalu anu kadaharanana téh sari kembang, boga tugas alamiah pikeun mantuan prosés penyerbukan dina tangkal kakao (coklat). Ari reungit bikang anu daharna getih?

Hiji mangsa, sakumaha kaunggel dina Tafsir At-Thabari, seratan Ibnu Jarir At-Thabari (310 H), aya kaum munafikun anu ngomong yén Alloh SWT dat anu agung, anu teu mungkin maparin tamsil ku sato-sato leutik. Maka terus turun ayat 26 surat Al-Baqoroh:

"Alloh mah teu isineun ngajieun tamsil ku sakadang reungit, atawa nu leuwih leutik batan reungit. Jalma-jalma iman tangtu surti yén anu hak téh datangna ti Alloh. Tapi, jelema-jelema anu katutup haténa tina iman, unjukan 'naon maksud Alloh ku ieu tamsil téh?'. Ku tamsil éta loba anu sasar, tapi loba ogé anu meunang pituduh. Tapi, teu aya saurang ogé anu disasarkeun anging jalma-jalma pasek".

Baca juga: Seks Teu Ilahar

At-Thabari ngutip riwayat Robi' bin Anas, reungit nu dimaksud dina ayat éta téh nyaeta alam dunya: "Reungit téh sok bisa hirup nalika lapar tapi paéh nalika seubeuh", teu jauh ti jelema, ari tos wareg makmak- mekmek mah, komo wareg ku amisna "kakawasaan" sok paéh ingetanana, poho sagala rupa.

Dina tafsir Fathul Bayan fii Maqaashidil Quran, beunangna Sodiq Hasan Khan Al-Qanuji (1308 H) ditegeskeun yén kecap reungit dina ayat 26 surat Al-Baqoroh téh peupeuhan keur jelema teu iman anu geus disindir sababaraha kali ku Alloh tapi ingkar waé.

Reungit anu dirékam ku Al-Quran, sarua waé jeung reungit anu kumeledang di alam kiwari dina papada ukuran leutikna. Ku kituna, pungsi reungitna masih sarua, nyaéta panggeuing pikeun jelema. Paling henteu, ku ayana Aedes aegypti, jelema jadi kageuing sangkan daék beberesih tur miara lingkungan. Lainna beberesih téh bagéan tina ciri jalma iman?

Halaman 1 2

Selanjutnya