Diajar Neureuy Kuciwa

Narawangan

Diajar Neureuy Kuciwa

Dian Nugraha Ramdani - detikJabar
Kamis, 19 Nov 2026 06:30 WIB
Salah satu tersangka pembunuhan Hj Komariyah di INdramayu
Salah satu tersangka pembunuhan Hj Komariyah di Indramayu (Foto: Burhannudin/detikJabar)
Bandung -

Diajar neureuy rasa kuciwa dina satengahing jaman anu ku Ranggawarsita disebut 'Zaman Edan' bakalna lain hungkul ngabuahkeun tingtrim kana haté tapi leuwih ti éta matak salamet kana badan.

Ngabandungan warta anu mumbul dina situs detikJabar jero minggu mimiti bulan Nopember 2026, loba pisan kajadian-kajadian anu matak ngangres keur nu maca.

Nyaéta, kajadian-kajadian rongkah nu nepi ka ngaleungitkeun nyawa manusa, anu lamun ditengetan mah éta kabéh téh dasar-dumasarna teu jauh ti rasa kuciwa anu dilajur.

SCROLL TO CONTINUE WITH CONTENT

Kajadian di Indramayu anu ngarandapan ka Hj. Komariyah, meureun moal nepi ka 'matak murel' nu maca lamun seug mah FSS (31) bisa neureuy sorangan kumaha nyerina rasa kuciwa jalaran narima omongan anu kurang pantes ti Hj. Komariyah.

FSS teh pernah raheut ku basa, nyaéta di antarana nalika Hj. Komariyah ngoméntaran imah manéhna, geningan 'nyieun imah téh tina duit nganjuk'. Moal boa aya omongan séjénna deui nu nambah raheut manah. Tapi jalaran FSS teu bisa neureuy rasa kuciwa antukna kakeuheulna lain béar, tapi kapegung nepi ka ngagunung.

ADVERTISEMENT

Hiji mangsa mah amarahna ngabeledug ngaliwatan palu anu dihantemkeun sababaraha kali kana awak Hj. Komariyah dugi ka tilarna.
Nyaéta nalika Hj. Komariyah keur nyorangan di imahna, samangsa carogéna mangkat kasab jeung murangkalihna sarakola.

Nanging, geningan teu tamat di dinya lalakon jahatna téh. FSS sasatna anu jadi tatangga Hj. Komariyah menta tulung ka NW. Duanana nyieun siasat ngarampog harta-banda Hj. Komariyah, ti mimiti duit, emas, nepi ka mobil Xpander bodasna.

Layon Hj. Komariyah diasupkeun kana Xpander, terus dibawa ka daerah pakebonan kai. Di dinya, kalawan maké béngsin écéran, mobil eusi layon téh diduruk. Samalah mah FSS ogé kaléntab tur ngacleng ku jelegurna minyak béngsin kaduruk. Ayeuna FSS jeung NW tos dicerek pulisi.

Lian ti kajadian di Indramayu, detikJabar ogé ngawartakeun kajadian di Kota Cimahi, ngeunaan pamuda meuncit awéwé 'beubeureuh nyakeudeung'-na anu mangrupakeun ibu rumah tangga meunang mesen ti onlén.

Di satengahing adegan déwasa, awéwéna ménta eureun. Duka kunaon. Teu jelas alesanana. Pamuda anu ngarasa 'keur kagok' téh antukna rungsing.

Lantaran kuciwa, haténa mentegeg. Di jero kamar kontrakan, éta pamuda ngaran RS (33) téh sup ka dapur, terus balik deui ka hareupeun awéwéna, TS (43) bari ngeupeul péso.

Péso nu geus jadi puseur amarah téh dipaju-pundurkeun seuseukeutna dina palebah beuheung TS. Kamar kontrakan banjir getih. Ayeuna RS geus dicerek pulisi.

Rasa kuciwa téh mémang matak mentegeg, tapi lamun dilajur bakalna beuki matak cilaka. Tina kajadian FSS jeung RS di luhur, duanana gé ngalajur nafsu, nganteur rasa kuciwa anu ngabalukarkeun kaduhung gedé. Keur mah pamuda nu ngaran RS di Cimahi mémang saméméhna 'keur ngalajur nafsu'.

Ceuk Ranggawarsita, nalika Zaman Edan tumiba nyaéta nalika situasi campuh ku bancang pakéwuh, krisis moral di mana-mana, urang teu perelu milu édan. Kaédanan anu ngajanggélék dina kahirupan sosial di sabudeureun urang, teu perelu dituturkeun atawa dilayanan.

Najan loba warta pembunuhan, moralitas para pamingpin nu lain picontoeun, jeung warta korupsi di mana-mana, salaku jelema urang teu perelu nurutan maranéhna. Hal-hal samodél éta lain ilahar keur urang.

Ranggawarsita ngajarkeun urang cukup baé jadi jalma anu sadar jeung waspada. Di antara sadarna urang téh nyaéta boga kamampuan 'neureuy rasa kuciwa'. Dina pada katujuh Serat Kalathida, Ranggawarsita nulis. Kieu Sunda-na:

"Hirup di Jaman Edan
Susah nangtukeun sikep atawa tindakan
Milu édan haté teu méréan
Mun teu milu édan
Teu kabagéan
Balukarna kalaparan
Tapi éta kabéh keresaning Allah
Najan nu édan mindeng bagja
Bagja kénéh jalma eling tur waspada."

(yum/yum)

Anda menyukai artikel ini

Artikel disimpan

Berita Terkait

 

 

 

 

 

 

 

 

Belum ada komentar.
Jadilah yang pertama berkomentar di sini

Hide Ads